O uso obsesivo dos teléfonos móbiles está alterando a convivencia das persoas en distintos eidos da nosa vida: desde o fogar, até o traballo, os centros educativos, as reunións de amigos… e as misas.

Na Ramallosa (Nigrán), o crego debe estar farto de que os móbiles perturben os oficios e a paz do lugar. Por iso, apareceu este aviso, cheo de sorna e humor, para os fregueses e curiosos:

“Ao entrares nesta Igrexa, é posíbel que escoites a ‘chamada de Deus’, pero non é nada probábel que te chame hoxe ao móbil. Grazas por apagar o teu teléfono. Se queres falar con Deus, entra, escolle un lugar tranquilo e fala con El. Se queres ver a Deus, mándalle un Whatsapp mentres conduces”.

O cartel foi compartido en Twitter pola conta A Boa Celeste© (@Dijochoeu).

“….Se queres ver a Deus, mándalle un Whatsapp mentres conduces”.
Bravo pola retranca do cura, ou do monaguillo, da capela de A Ramallosa (Nigrán).
👏👏👏 😂😂😂 pic.twitter.com/3WC37BEoBe

— A Boa Celeste© (@Dijochoeu) 5 de xuño de 2019

A autoría atribúeselle a Xosé Manuel Lence, crego de San Pedro da Ramallosa. Un cura peculiar que non só aposta pola lingua galega, senón que tamén por métodos innovadores na Igrexa: “Xa teño escoitado deste párroco. Mandalles pdfs por wassap aos feligreses con información de importancia (horarios de misas, enterros, etc) ollo”, contestou no fío de Twitter o usuario @PablitoH.