O delegado do Goberno en Galicia, Javier Losada, avanzou que o mozo que conducía o automóbil accidentado na AP-9, que se saldou coas mortes de tres estudantes, non se atopaba baixo os efectos alcol nin das drogas.

Preguntado polos medios tras participar nun acto en Vigo, Losada confirmou que o condutor do coche, M.M.V., de 18 anos de idade, deu negativo nas probas de consumo de sustancias estupefacientes e de alcol que se lle realizaron.

Por este motivo, considerou posible que a causa do accidente fose un exceso de velocidade, aínda que recalcou que aínda non se confirmou e que, nestes momentos, a Garda Civil leva a cabo unha investigación respecto diso. Tamén indicou que polo menos catro dos ocupantes levaban posto o cinto de seguridade.

O suceso tivo lugar este mércores ao redor das 21,30 horas na AP-9, á altura da parroquia viguesa de Teis, cando se produciu a saída de vía dun vehículo no que viaxaban cinco mozos. Como consecuencia, o condutor e o copiloto resultaron feridos, polo que foron trasladados a dous hospitais da cidade.

Mentres, os ocupantes dos asentos traseiros, dúas mozas e un mozo de entre 17 e 18 anos de idade, faleceron. O tres eran procedentes de Redondela, aínda que o mozo residía en Pazos de Borbén. Así mesmo, este xoves, o Concello de Redondela (Pontevedra) decretou dous días de loito oficial polo falecemento dos tres mozos.