O buque oceanográfico ‘Vizconde de Eza’ parte este mércores do porto de Vigo rumbo a augas do Gran Banco de Terranova para desenvolver, nos próximos tres meses, as campañas de investigación pesqueira ‘Platuxa’, ‘Flemish Cap’ e Fletán Negro3L’.
Estas campañas de investigación, incluídas no Programa Nacional de Recompilación, Xestión e Uso dos Datos Pesqueiros (PNDB) e cofinanciadas polo Goberno de España e a UE, son organizadas e dirixidas polo Instituto Español de Oceanografía e, en concreto, por científicos do programa de Pesqueiras Afastadas, que analizan a área de regulación da NAFO.
A campaña ‘Platuxa’, que terá lugar entre o 29 de maio e o 27 de xuño na división 3NON, vive este ano a súa 25ª edición, e ten por finalidade obter información biolóxica sobre recursos como o bacallau, fletán negro, camarón, raias e outras especies de interese para a frota española.
Para iso, realízanse pescas estandarizadas de 30 minutos, identifícanse as especies capturadas, e consérvanse mostras de gónadas e otolitos, para realizar estudos de madurez e crecemento. Así mesmo, identifícanse e pesan todas as especies de invertebrados bentónicos e, en todas as estacións de mostraxe, obtense un perfil hidrográfico cunha sonda de profundidade, temperatura e condutividade, para coñecer as condicións ambientais das pescas.
Na actualidade, esta campaña é a mellor fonte de datos independentes da pesqueira comercial na área prospectada e a información obtida utilízase na reunión do Consello Científico de NAFO para avaliar os recursos pesqueiros de interese comercial para a frota española no Gran Banco de Terranova.
Ademais desta campaña, nos próximos meses realizaranse tamén a campaña ‘Flemish Cap’, do 28 de xuño ao 31 de xullo na división 3M; e a campaña ‘Fletán Negro 3L’.
O persoal científico embarcado estará composto por tres investigadores e técnicos do Instituto Español de Oceanografía, dez observadores científicos, unha alumna universitaria en prácticas da Universidade de Alacante e un técnico electrónico. A eles hai que sumar os 21 membros da tripulación do ‘Vizconde de Eza’.
