Axentes da Policía Local de Vigo identificaron a catro persoas, dous homes e dúas mulleres, implicados nunha liorta que tivo lugar ás portas do Hospital Álvaro Cunqueiro na tarde noite do xoves.

Segundo informaron fontes policiais, varias dotacións do 092 desprazáronse á entrada do centro hospitalario, tras recibir distintas alertas por unha pelexa multitudinaria, na que varias persoas estaban a increpar aos vixiantes de seguridade do hospital.

Unha vez no lugar, os axentes identificaron aos implicados: un veciño de Vigo de 46 anos de idade, J.G.J.; outras dúas veciñas de Vigo, B.J.C., e E.M.G.J.; e A.C., veciño de Ponteareas de 34 anos de idade.

Segundo relataron as testemuñas, o tres primeiros encerelláronse nunha pelexa co cuarto, e cando os vixiantes de seguridade se interpuxeron para separalos, acabaron sendo ameazados e intimidados por estes.

A Policía incautouse dun bastón coa parte de abaixo reforzada, e que lle foi intervido a J.G.J., e dun cable de aceiro cunha peza metálica compacta nun dos extremos, requisado a A.C.

Ademais da identificación dos implicados, a Policía tramitou a denuncia pola tenencia destes obxectos perigosos, e que pode implicar unha sanción administrativa de polo menos 600 euros para cada un dos portadores dos devanditos obxectos.