A candidata do PP á Alcaldía de Vigo, Elena Muñoz, iniciou a campaña das municipais expondo “a maior rebaixa fiscal da historia” da cidade, con medidas como a redución do IBI, a eliminación da plusvalía municipal ou a rebaixa no IAE.
Así, Muñoz prometeu, que se goberna a cidade, levará a cabo unha reforma impositiva que marcará “un antes e un despois” para os vigueses, que levan tempo vendo como os impostos que teñen que pagar soben “ano a ano”. Nese sentido, avogou por complementar as bonificacións e axudas a familias e empresas cunha rebaixa de taxas. Segundo explicou, o seu partido propón eliminar a plusvalía municipal, “un gravame inxusto e anacrónico”; reducir o Imposto de Bens Inmobles (IBI) nun 25 por cento; a mesma redución no Imposto de Actividades Económicas (IAE); e a mesma no imposto d Circulación.
A candidata do PP defendeu que este “alivio” para os petos dos vigueses é “compatible co mantemento da a calidade dos servizos públicos”, porque se pode atraer e manter a empresas na cidade, de modo que “serán máis a pagar e a xerar emprego”. “Xa se fixo noutros concellos e é posible”, incidiu, á vez que lamentou que, actualmente, as empresas atópanse con “todo tipo de trabas” para instalarse en Vigo.
