A Asociación Veciñal de Teis denunciou a falta de avances levados a cabo para a construción dunha residencia pública de maiores neste barrio vigués por parte da Xunta e recalcaron que o Goberno galego previra que “se terminaría nesta lexislatura”.

Mediante un comunicado, os veciños de Teis insistiron na “demanda social” de prazas para residencias de maiores na cidade e lembraron que se esixiu a construción dun establecemento destas características nos terreos da ETEA “desde hai anos”.

Ademais, afirmaron que contactaron por escrito coa conselleira de Política Social, Fabiola García, o pasado 11 de marzo por este motivo e que, con todo, aínda non recibiron “ningunha resposta”.

Adicionalmente, sinalaron que existe unha “alta demanda” de prazas para centros de día en Vigo, unha situación ante a que propuxeron a inclusión da construción dun deles no proxecto da residencia.