A Porta do Sol de Vigo acollerá este martes, a partir das 20,00 horas, un acto de recordo en memoria da moza Déborah Fernández Cervera, cuxa morte segue sen resposta 17 anos despois, e no que haberá música, poesía e arte.
A familia da moza, cuxo cadáver apareceu nunha cuneta do Rosal en maio de 2002, organizou esta concentración e leva semanas recollendo firmas na plataforma change.org para pedir que se reabra o seu caso, aínda sen resolver –superaron xa os 225.000 apoios-
Segundo insisten os seus achegados, que están a solicitar documentación para solicitar xudicialmente a reapertura da investigación, “achégase a data de prescrición do delito”, e queren demostrar “a inxustiza e desidia” coa que se levou este caso, polo que non se chegou a imputar formalmente a ninguén, e que pasou por varios xulgados antes do seu arquivo provisional.
A familia de Déborah quixo organizar así un acto para agradecer o apoio de todos os cidadáns na súa loita por reabrir o caso, e “aproveitar a ocasión para ensinar a faceta máis persoal de Déborah, a arte en estado puro”.
Por iso, na concentración deste martes participarán de forma desinteresada numerosos artistas: o artista urbano Powone USC, que pintará un retrato de Déborah; e varios músicos e bandas (Patricia Moon, Carolina Gutiérrez, Daniela DiCostas e Lorena Freijeiro as bandas Maldito Murphy ou A Síndrome de Penny Lane, ou o rapero Mancloy). O acto finalizará cunha ofrenda floral.
