O derrube é imparable, pero unha vintena de gatos rueiros conseguiron frear a demolición da antiga nave de Cordelerías Mar, en Jacinto Benavente.
Para o inicio do derrubamento agardábase a presenza do alcalde vigués, Abel Caballero, pero a presenza de activistas do partido animalista PACMA e da asociación Gatiños da Rúa, e a presión para retrasar a demolición fixeron que o rexedor non aparecese.
Os animalistas estiveron traballando durante a pasada noite e durante a mañá deste martes na recollida dos animais, que formaron unha colonia neste edificio. Tras rescatar a dez, outros nove quedaban aínda esta mañá dentro da antiga nave, polo que os activistas, acompañados por un avogado, conseguiron frear temporalmente a demolición, até salvar todos os gatos.
O derrubamento iniciouse hoxe, para preparar o espazo para a construción dun complexo residencial.
