A Sección Quinta da Audiencia Provincial de Pontevedra, con sede en Vigo, absolveu un home acusado dun presunto delito de abusos sexuais continuados con penetración perpetrados contra a filla menor de idade da súa parella.

A sentenza, contra a que cabe recurso ante o Tribunal Supremo (TS), recolle que, aínda que é “factible” que os abusos tivesen lugar, existen “dificultades” para corroborar o testemuño incriminador “tanto por parte das testemuñas como do informe pericial”. Así, indica que “non existe proba de cargo suficiente” de que o acusado cometese os actos denunciados “para desvirtuar o principio de presunción de inocencia”.

A Fiscalía pedía nove anos de cárcere para o acusado, unha orde de afastamento respecto da nena durante quince anos e unha indemnización para a mesma de 10.000 euros. Ademais, solicitara a prórroga da orde de afastamento cautelar ata que se emitise unha resolución xudicial firme.

O tribunal considera probado que o acusado, a súa parella e a filla dela, nada no ano 2000, convivían en Vigo desde o ano 2003, así como que, en xuño de 2016, a adolescente informou o seu titor do instituto de que fora vítima de abusos por parte da parella da súa nai desde que tiña “13 ou 14 anos”.

O escrito recolle que ela asegurou ao seu profesor que o acusado comezara a realizarlle tocamentos en principio por enriba da roupa e logo por dentro, así como que, posteriormente, a obroigaba a facerllos a el cando a súa nai non se atopaba no domicilio familiar, onde tiñan lugar os supostos abusos, ou mentres durmía. O resumo de feitos probados tamén indica que, tras a reunión da nena co seu titor, o centro educativo trasladou esta información á Comisaría de Policía.

A moza sostivo que o seu primeiro recordo dos actos denunciados remóntase a cando ela tiña 10 anos e que, desde que tiña 13 ou 14, o acusado realizáballe tocamentos mentres lle daba masaxes nas costas. Tamén detallou que el “se puña de mal humor cando ela lle dicía que a deixase, polo que accedía ao que lle pedía”. Nos actos denunciados tamén se recollen episodios de masturbación, sexo oral e un intento de penetración por parte do acusado.

Así mesmo, segundo recolle a sentenza, a moza manifestou que tamén relatou a varios amigos os feitos denunciados e que estes tiveron lugar ata o ano 2016.