O alcalde de Vigo, Abel Caballero, presentou este venres os “requisitos imprescincibles” que esixirá para dar o visto e prace ao proxecto de ampliación de Navia promovido pola Xunta e que inclúen, entre outras peticións, o soterramento da VG-20 ao seu paso polo barrio, ou a construción dun instituto de ensino secundario.

Así o expuxo o rexedor nunha rolda de prensa, na que avanzou que o goberno municipal esixe, en primeiro lugar, que non se utilice “nin un só metro cadrado de zona verde” para construír aparcadoiros. Así mesmo, reclama un novo acceso desde o barrio á Avenida de Europa, en condicións de “seguridade” e cunha glorieta reguladora do tráfico, e reducir a “altura excesiva” dalgunhas edificacións previstas.

Tamén reclama que Fomento soterre a VG-20 que pasa ao sur do polígono, e que instale pantallas acústicas. Finalmente, sinalou que o Concello cederá parte do solo dotacional que lle corresponda para que a Xunta constrúa un instituto.

Segundo o rexedor, estas esixencias non lle supoñen ao goberno galego cambios substanciais no orzamento destinado á ampliación do Navia. No caso da VG-20, sinalou que a actuación corresponderíalle ao “todopoderoso Ministerio de Fomento”.

“Isto non son suxestións, son unha imposición”, matizou Caballero, que reclamou un “compromiso” da Xunta para asumir estas peticións. A ese respecto, ante preguntas dos medios sobre unha eventual negativa do goberno galego, o alcalde proclamou: “Dubido moito que o fagan contra o Concello, e contra a xente de Navia”.