O director da planta de PSA Peugeot Citroën en Vigo, Ignacio Bo, precisou este venres que a “urxencia” da fábrica de Balaídos é poder “integrarse” na contorna, e o seu principal interese está na creación dun anel verde ao redor das instalacións.

Así o matizou a preguntas dos medios durante unha visita ao Centro Tecnolóxico de Automoción (CTAG), na que acompañou ao presidente da Xunta, Alberto Núñez Feijóo, e ao conselleiro de Economía, Emprego e Industria, Francisco Conde.

Ante a polémica sobre unha eventual urxente ampliación do polígono de Balaídos (posta sobre a mesa polo alcalde de Vigo, que anunciou que pedirá a aplicación da lei 3 /2016 para axilizar a tramitación urbanística), Ignacio Bo aclarou que a mensaxe que a dirección da fábrica trasladou ás institucións (Zona Franca, Concello e Xunta) é que o seu “interese fundamental” é “que a integración da fábrica sexa a mellor posible”.

A ese respecto, apostou por construír un “anel verde” ao redor da factoría porque PSA quere ten “unha boa relación coa contorna” e “que non haxa afección mutua”. “A nosa vocación é fabricar en Vigo durante moitos anos”, proclamou.

En relación a unha posible ampliación do polígono, o director da planta sinalou que, se se fai esa ampliación, PSA podería estar “interesada” e podería facer uso deses espazos, sobre todo para a localización de provedores, o que axudaría a reducir custos loxísticos. No entanto, insistiu en que “neste momento, os procesos produtivos (da planta) están cubertos” e que “o que está en discusión é a urxencia”. “A nosa urxencia hoxe é a integración na contorna”, aclarou.