Axentes da Policía Nacional da Comisaría de Vigo detiveron un mozo de 27 anos de idade, como presunto autor dun roubo con violencia, outro en grao de tentativa e un delito de lesións.

Segundo informaron fontes policiais, os feitos ocorreron a pasada noite, cando unha dotación do 091 acudiu ao barrio do Calvario tras recibir un aviso de que un viandante fora atracado a punta de navalla. A vítima relatou aos axentes que, cando ía camiñando pola rúa Mestre Soutullo, na confluencia coa rúa Toledo, un home abordouno por detrás. O ladrón intimidouno cunha navalla e esixiulle que lle entregase o diñeiro.

Ao dicirlle que non tiña diñeiro, o presunto ladrón aumentou as súas ameazas e pediulle o teléfono e todo o que levaba encima, mentres se achegaba coa navalla na man. O viandante realizou un rápido movemento e logrou fuxir correndo cara á rúa Jenaro de la Fuente.

Grazas á descrición achegada por esta vítima, a Policía conseguiu localizar pouco despois o sospeitoso e, ao cachealo, atopáronlle, entre outros efectos, unha navalla ‘tipo mariposa’ e outra de menor tamaño Os axentes déronse conta de que a primeira navalla e o aspecto do individuo coincidían coa descrición facilitada na denuncia doutro roubo. Así, atribúenlle a este home unha tentativa de roubo cometida días atrás a un viandante na rúa San Roque.

Naquel caso, a vítima relatou que, cando ía camiñando pola rúa, o sospeitoso achegóuselle e, sen mediar palabra, púxolle unha navalla no pescozo, á vez que o ameazaba con cortarllo se non lle entregaba o diñeiro. Ante o risco para a súa vida, o denunciante agarrou a navalla e tirouna ao chan, á vez que empuxaba o sospeitoso e pedía auxilio a berros. O ladrón recolleu a arma branca do chan e escapou do lugar á carreira, mentres que a vítima tivo que ser atendida no hospital por dous cortes profundos nos dedos.

O home detido e as dilixencias practicadas foron postos a disposición do xulgado de garda de Vigo.