O alcalde de Vigo, Abel Caballero, respondeu este mércores ás críticas da Xunta polo mal estado dos accesos do hospital Meixoeiro, e lembrou que, desde 2015, o goberno autonómico ten sobre a mesa unha proposta de convenio remitida polo Concello olívico para “cofinanciar” a mellora da contorna do hospital.
Segundo explicou o alcalde, fai catro anos Sanidade expuxo ao consistorio a mellora deses espazos e accesos “e desde aquel momento ata agora, o único que fixo foi baleirar o hospital”, por tanto instou, en primeiro lugar, a abrir máis camas e dotar de máis servizos ese centro sanitario.
En segundo lugar, Caballero incidiu en que, en 2015, o Concello fixo unha serie de formulacións técnicas e propuxo un convenio para “cooperar no financiamento dunha mellora que ten que ver cunha instalación sanitaria”, sen obter resposta.
Segundo sinalou, a Xunta “só acórdase destas cousas cando chegan as campañas electorais, pero cando hai que achegar recursos se esquecen”. “Só se acordan en época electoral, despois escurren o vulto e non dedican diñeiro a mellorar as inmediacións dun hospital”, aseverou e engadiu: “Baste como referencia o Álvaro Cunqueiro. Fíxose á brava e a contorna, non se preocupan del. Iso si, cobran o aparcadoiro”.
