Os grupos da oposición no Concello de Vigo pediron de novo este mércores “responsabilidades políticas” e “decisións” trala sentenza que condena a un funcionario vigués polo ‘enchufe’ da cuñada da presidenta da Deputación, Carmela Silva, nunha concesionaria municipal.
Segundo sinalou en rolda de prensa a portavoz ‘popular’, Elena Muñoz, esta resolución da Audiencia Provincial “é a constatación da corrupción no goberno de Vigo“, no que houbo “unha trama para contratar á cuñada de Carmela Silva, por uns traballos que non fixo, pero que si se lle pagaron con diñeiro de todos os vigueses”.
Por iso, Elena Muñoz proclamou que “chegou o momento de tomar decisións” e recalcou que Carmela Silva está “incapacitada” para exercer responsabilidades políticas. Así mesmo, reclamou tamén a Santos Héctor Rodríguez (que dirixía as áreas onde traballaba o funcionario condenado) que dimita.
A portavoz do PP anunciou que o seu grupo vai pedir un pleno extraordinario para abordar esta cuestión e reclamar esas responsabilidades políticas, ademais do cesamento do funcionario; á vez que advertiu de que “isto é o cumio do iceberg, e coñeceranse máis cousas”.
Pola súa banda, Marea de Vigo, que tamén apuntou que “a dimisión de Santos Héctor Rodríguez debería ser inmediata”, sinalou que a sentenza pon de manifesto a existencia dunha “rede clientelar” de altos funcionarios “colocados” polo alcalde, Abel Caballero, polo sistema de libre designación.
No caso concreto deste funcionario condenado, o portavoz do grupo, Rubén Pérez, recordou que, durante 8 anos, ocupou de forma simultánea dúas xefaturas de área. Por iso, pediu “que se revise” toda a xestión e trámites que pasaron polas súas mans, os convenios asinados por el e outras actuacións.
Do mesmo xeito, referiuse ao xerente da concesionaria Imesapi, tamén condenado neste proceso, e expresou as súas sospeitas sobre a súa situación como “persoal subrogable” nos pregos (do mantemento da iluminación), cando cobraba un soldo “executivo” maior que o do propio alcalde.
Finalmente, con respecto ao vínculo familiar da muller contratada en Imesapi, o portavoz de Marea sinalou que “non é a cuestión máis grave”, aínda que expresou a súa sorpresa porque o funcionario condenado “diga que non a coñecía de nada e o fixera todo para que a contraten”.
Por outra banda, para Compromiso por Galicia, “a contratación, por parte dunha das principais empresas concesionarias dos servizos municipais, da cuñada da actual presidenta da Deputación de Pontevedra; xa con sentenza condenatoria no Xulgado de Instrucción nº7 de Vigo; non deixa de ser un chanzo mais dun modo de actuar e facer política do noso alcalde. O funcionario do concello é culpado a 9 anos de inhabilitación por facer o traballo sucio que lle mandaron desde o último andar do PSOE vigués, no triunvirato que forman Abel, Carmela e Santos Héctor. É unicamente por unha mal entendida lealdade, que prefire gardar silencio e ser sacrificado polo ben do actual Alcalde. Para o secretario local galeguista, Xoán Antonio Cortés: “O PSOE vigués esta infectado do virus caciquista e está a “Baltarizar” a política viguesa”.
“O diálogo é ausente, a venda de favores e a prepotencia invaden o despacho do señor alcalde. A relación do alcalde coa FAVEC e a situación do estadio de Balaídos amosan a cara escura dunha cidade que vive cos ollos pechados a moitos dos problemas que o alcalde tapa co silencio dos medios”, engadiron.
O alcalde de Vigo, Abel Caballero, optou polo silencio, e eludiu pronunciarse acerca da sentenza que condena a un alto funcionario do Concello olívico a cinco anos de cárcere e nove de inhabilitación, por idear un plan para que unha concesionaria municipal contratase a unha cuñada da presidenta da Deputación, Carmela Silva, a cambio da adxudicación de varios contratos.
Nunha rolda de prensa, e a preguntas dos medios sobre esa resolución da Audiencia Provincial de Pontevedra, o rexedor limitouse a aseverar: “Non a valoro”.
Cuestionado sobre se o goberno municipal tomaría algunha medida con respecto ao funcionario condenado, insistiu: “Non fago ningunha valoración, remítolles ás leis. Nós sempre cumprimos as leis”.
