O alcalde de Vigo, Abel Caballero, garantiu este mércores que o estudo hidroxeolóxico que fará o Goberno para a variante de Cerdedo do AVE sairá adiante independentemente de que non se aproben os Orzamentos Xerais do Estado (PGE) porque Adif ten fondos para executalo.
Así o afirmou nunha rolda de prensa na que recalcou que ese estudo para o AVE directo Vigo-Madrid “non necesita” do PGE, e na que volveu a mostrar a súa satisfacción polo “desbloqueo” deste proxecto, despois de que o PP o tivese “5 anos nun caixón”.
“Isto é da maior importancia para a cidade, lémbrolles que eu convoquei manifestacións”, apuntou o rexedor olívico, quen proclamou que o presidente da Xunta, Alberto Núñez Feijóo, “pódese poñer como queira”, pero o AVE Vigo-Madrid “non hai quen o pare”.
Con respecto ao estudo hidrogeológico, sinalou que é unha condición establecida en época do Goberno de Rajoy e que debe realizarse necesariamente durante 36 meses porque debe recoller información do comportamento hídrico dos terreos afectados “durante as distintas estacións do ano”.
Segundo Abel Caballero, se en xaneiro de 2015 a entón ministra de Fomento encargase o estudo, non se acumulou este atraso “e agora estaríase facendo a obra” do tramo do AVE. “A ver como o explica Ana Pastor, por certo, deputada pola provincia de Pontevedra”, apostilou o alcalde.
