O alcalde de Vigo, Abel Caballero, asegurou este luns que o goberno local está a traballar na recualificación da parcela municipal situada á beira dos actuais xulgados para construír alí un edificio singular que albergue a Biblioteca do Estado, e sinalou que, no tempo que dure este trámite (uns 8 ou 9 meses), o Ministerio de Cultura elaborará o proxecto desa infraestrutura cultural.

Nunha rolda de prensa, o rexedor olívico subliñou que o proxecto da Biblioteca do Estado está “en marcha” e que, de feito, os técnicos do Ministerio visitan este luns a parcela.

Segundo avanzou, o goberno local está a tramitar a recualificación do chan para darlle uso dotacional e, mentres, o Goberno central redactará o proxecto da biblioteca, financiándoo con cargo a remanentes. É por iso, aclarou, que “non necesita estar nos orzamentos”.

Abel Caballero asegurou que a finais deste ano a recualificación e o proxecto estarán listos e, entón si, recolleranse nos Orzamentos Xerais do Estado os “millóns” necesarios para a súa construción (que se iniciará o ano que vén).

O alcalde criticou á Xunta por oporse a que Vigo conte cun edificio “novo, singular e moderno” para albergar a biblioteca, e propor unhas torres (os actuais xulgados) que non estarán dispoñibles ata que se abra a nova Cidade da Xustiza e que, ademais, son de “mala construción”.