O grupo municipal Marea de Vigo advertiu este luns de que o primeiro documento do novo Plan Xeral de Ordenación Mmunicipal (PXOM), o informe sobre a metodoloxía e o diagnóstico socioeconómico, adoece de “importantes carencias”.
Nunha rolda de prensa, o portavoz do grupo, Rubén Pérez, advertiu de que ese documento “volve consolidar o modelo de cidade que leva anos secuestrando o urbanismo vigués”, e que “non se ten en conta a realidade social, demográfica ou necesidades dotacionais”.
A ese respecto, sinalou que se repiten algúns dos “erros” que levaron ao cuestionamiento e denuncia do Plan do 2008, como a coñecida como ‘Rolda de Vigo’. “O novo equipo redactor se quere un desenvolvemento urbanítico diferente, queda constreñido a estes ‘mandamentos’ que lles entregaron, para que non se movan de aí”, engadiu.
Tamén advertiu de que é “imposible” que repita o modelo de progresión de número de vivendas que se recollía no plan anulado; e que mesmo os propios redactores apostan por “repensar a estratexia económica” do Plan Xeral.
Rubén Pérez sinalou, así mesmo, que non se pode priorizar a rehabilitación, como propón o informe, “e logo expor a recuperación de todos os ‘peris’ e ámbitos que recollía o plan do 2008”.
Finalmente, o portavoz de Marea apostou pola participación e por “buscar consensos” ao redor de algo tan vital para a cidade como o urbanismo, e volveu a pedir que todo o relacionado coa PXOM se debata nunha comisión de urbanismo e nun consello municipal de Urbanismo.
