O goberno municipal de Vigo prevé licitar o próximo mes de xuño a obra de reforma da bancada de Marcador, no estadio de Balaídos, “se non hai cambadelas” da Xunta de Galicia ou do presidente Núñez Feijóo, que “quere levar o Celta de Vigo para Mos”.

Así o manifestou o alcalde, Abel Caballero, nunha rolda de prensa na que explicou que o goberno recibiu hai uns días o proxecto básico desa bancada, “e estase traballando no proxecto de execución”.

De feito, están a facerse cálculos para valorar as estruturas que van soster a obra, con estudos xeotécnicos do terreo e perforacións para medir a dureza e composición do chan.

Segundo confirmou o rexedor olívico, a próxima semana remitirase o proxecto básico ao Real Club Celta e a Augas de Galicia, que teñen que emitir un “informe vinculante”. A partir de aí, o Concello espera licitar a obra en xuño.

“Se non hai cambadelas, que as pode haber porque a Xunta non ten ningún interese en que o Celta xogue en Balaídos, licitaremos en xuño”, incidiu, e recordou que a obra permitirá que a bancada se aproxime” e chegue a 8 metros do terreo de xogo, e conte con 6.700 asentos.