A conselleira de Educación, Universidade e Formación Profesional, Carmen Pomar, destacou que o IES de Teis é un “referente” na oferta de ensinos profesionais de Informática e comunicacións e de Imaxe Persoal, tanto de grao medio como superior e de FP Básica.
Carmen Pomar, visitou este mércores o IES de Teis, en Vigo, para comprobar as obras de ampliación acometidas no centro, que supuxeron un investimento de 1,6 millóns de euros por parte do seu departamento, e explicou que este instituto aglutina a práctica totalidade dos ciclos existentes en Galicia en Informática e Imaxe Persoal.
A ampliación das instalacións, segundo trasladou Educación, foi deseñada co obxecto de dar resposta ás necesidades de crecemento que está a experimentar a FP, coa implantación da FP Básica e dos ciclos formativos de 2.000 horas.
Pomar celebrou que o IES de Teis, con máis de 1.000 alumnos matriculados, participe en programas educativos impulsados pola consellería, así como a súa incorporación ao proxecto ‘E-dixgal’ e a participación nos ‘Plans Proxecta’, nos ‘Contratos-Programa’ e no ‘Erasmus+’.
Na súa visita a Vigo, a conselleira tamén anunciou que o seu departamento ten programado investir medio millón de euros para dotar dun pavillón e de talleres ao CIFP Manuel Antonio, onde tamén se imparten cursos de FP.
