A Acampada pola Vivenda de Vigo mantense na Praza de Compostela da cidade e, aínda que manteñen a protesta como “indefinida”, confirmaron que este sábado celebrarán unha asemblea para decidir a súa continuidade, ao tempo que sinalaron que, en contacto con outras acampadas de Galicia, valoran unha posible “desacampada” simultánea.

Así o trasladou unha das participantes, C.B., que explicou que, en todo caso, o “campamento” se mantén, e xa son arredor de 70 as tendas instaladas nese espazo de Vigo, coñecido como a Alameda. Segundo precisou, polo momento están “tranquilas”, teñen “boa relación” coa Policía, contan co “apoio” da Subdelegación do Goberno e nada fai temer un desaloxo coma o ocorrido na Porta do Sol de Madrid.

“Non temos medo, estamos organizadas e cremos que non vai haber ningún inconveniente”, explicou, ao tempo que subliñou que a relación cos veciños da contorna é boa, e que moitos deles lles amosan o seu apoio levándolles comida e outros materiais. “Hai unha minoría, que ás veces parece facer moito ruído, pero non representa en absoluto a maior parte da xente desta cidade”, engadiu.

Esta participante na acampada explicou que, ao longo da xornada, realizan labores de limpeza e organización, charlas informativas e obradoiros. Nestes momentos, indicou, o traballo céntrase na preparación da folga xeral do 11 de novembro. En Pontevedra, a Acampada defendeu nunha rolda de prensa a continuidade dese espazo como punto de encontro e de apoio veciñal, e fixo un chamamento a participar na folga para defender a vivenda como “un dereito e non un negocio”.