O Pleno do Concello de Vigo aprobou este luns por unanimidade unha moción do grupo socialista para esixir á Xunta de Galicia compensacións xustas para os máis de 400 propietarios afectados polos Proxectos de Interese Autonómico (PIA) previstos nas zonas do Ofimático e Ramón Nieto-Santa Cristina, que contemplan expropiacións de vivendas e terreos.
A concelleira de Urbanismo, María José Caride, defendeu a necesidade de construír vivenda pública na cidade, pero criticou o procedemento escollido polo Goberno galego, ao considerar que os PIA son unha ferramenta que “leva por diante os dereitos dos veciños e do Concello”. Segundo explicou, as actuacións previstas afectan a máis de 400 propietarios e arredor de 85 vivendas, polo que reclamou que as persoas afectadas reciban compensacións económicas xustas.
Caride considerou “imprescindible” a creación dunha mesa de diálogo cos propietarios para escoitar as súas demandas e atender as súas necesidades. Ademais, criticou que, tras anos de gobernos do PP na Xunta, apenas se construísen unhas decenas de vivendas protexidas en Vigo e ningunha destinada ao alugueiro social.
Pola súa banda, o portavoz municipal do BNG, Xabier Pérez Igrexas, coincidiu na necesidade de impulsar vivenda pública e protexer os dereitos dos afectados, pero cuestionou o uso dos PIA, que definiu como “unha barra libre” para a actuación autonómica. O nacionalista lembrou que existen outras alternativas para abordar o problema da vivenda, como a mobilización do amplo parque de inmobles baleiros que hai na cidade.
Desde o PP, Fernando G. Abeijón asegurou que os populares defenderán os intereses dos veciños e o respecto aos seus dereitos. Con todo, matizou que a Xunta xa mantivo reunións cos afectados e continuará facéndoo. Neste sentido, contrapuxo esa actitude á do alcalde de Vigo, Abel Caballero, ao que reprochou a súa relación cos propietarios afectados polo proxecto da nova autovía na parroquia de Bembrive.
VIGO RECLAMA 20 MILLÓNS Á DEPUTACIÓN PARA AMPLIAR O IFEVI
Na mesma sesión, o Pleno aprobou outra moción socialista para reclamar á Deputación de Pontevedra unha achega de 20 millóns de euros destinada á ampliación e modernización do Instituto Ferial de Vigo (Ifevi). A proposta contou cos votos favorables do PSOE e do BNG e coa abstención do PP, que presentou unha emenda finalmente rexeitada.
O portavoz socialista, Carlos López Font, defendeu que a institución provincial, que forma parte do órgano de goberno do recinto feiral, debe contribuír economicamente ao proxecto. Segundo denunciou, a Deputación “non pon un euro”, polo que reclamou que achegue, como mínimo, a mesma cantidade comprometida polo Consorcio da Zona Franca de Vigo: 20 millóns de euros.
Pola súa banda, a portavoz do PP e vicepresidenta da Deputación, Luisa Sánchez, cualificou a reclamación do Goberno municipal de “reacción infantil” e acusou a Abel Caballero de intentar apartar a institución provincial do padroado do Ifevi. “Actúa como un neno pequeno, caprichoso”, afirmou Sánchez, que acusou o rexedor de buscar “escusas” para paralizar a ampliación do recinto feiral.
A representante popular presentou unha emenda para reclamar tamén achegas económicas ao resto das institucións que forman parte do padroado e pedir explicacións sobre por que o Concello non esixiu esa contribución cando a Deputación estaba presidida pola socialista Carmela Silva. A proposta do PP foi rexeitada.
Finalmente, López Font criticou duramente a emenda presentada por Sánchez, ao considerar que “reflecte o que é o PP de Vigo contra a cidade”. O socialista tamén arremeteu contra a vicepresidenta provincial, da que afirmou que ocupa ese cargo “de casualidade” e como “premio de consolación”.
