Dúas persoas tiveron que ser trasladadas ao hospital tras verse afectadas por inhalación de fume nun incendio nun piso na avenida de Balaídos de Vigo. Tal e como indicou o 112 Galicia, foi un particular quen deu aviso do lume, pouco antes das 14.00 horas deste sábado. Segundo explicaba, prendera o aceite dunha tixola, aínda que xa o tiñan case apagado. Con todo, inhalaran algo de fume.

Ao lugar desprazáronse efectivos do Servizo de Urxencias Sanitarias de Galicia-061, dos Bombeiros de Vigo e da Policía Nacional. Á súa chegada, a dotación de bombeiros indicou que o lume xa fora case sufocado polos ocupantes da vivenda, de maneira que ardeu a campá extractora e quedaron afectados os mobles máis próximos.  Finalmente, foi necesario trasladar dúas persoas ao hospital de referencia tras inhalaren fume durante o incidente.