RTVE anunciou os 18 artistas que competirán pola Sirenita de Ouro na sexta edición do Benidorm Fest, que se celebrará en xaneiro de 2027. As propostas, de estilos e traxectorias diversas, foron seleccionadas entre preto de 900 candidaturas. Entre elas, a única candidata galega é a viguesa Dani Dicostas, que conta con tres discos no mercado, incluído “Amores pasajeros”, publicado a comezos deste ano. O seu nome súmase aos do grupo valenciano Bombai, Vicco, que volve probar sorte, Merche, Andrés Koi ou Ladilla Rusa, segundo deu a coñecer RTVE nunha rolda de prensa celebrada en Prado del Rey, en Madrid.
A listaxe completa de participantes está formada por Alba Morena, Andrés Koi, Bombai, Chema Rivas, Dani Dicostas, Fran Tuduri, Gale, Isabel Aaiún, Ladilla Rusa, Merche, Pipiolas, Polo Nández e Sebastián Llosa, Rossa, Sara Abad, Sev’s, Suzete, Tami Tamako e Vicco. As cancións coas que competirán presentaranse o próximo 17 de decembro. Respecto do proceso de selección, RTVE informou de que recibiu 896 cancións durante os 115 días que permaneceu aberta a convocatoria, das cales 350 chegaron nas últimas 24 horas. A corporación abriu este ano o prazo antes, co obxectivo de mellorar a planificación e dispoñer de máis tempo para traballar posteriormente coas propostas seleccionadas. O certame celebrarase do 23 ao 30 de xaneiro, con dúas semifinais o martes 26 e o xoves 28. A gran final do sábado 30 decidirá quen sucede a Chanel, Blanca Paloma, Nebulossa, Melody e Tony Grox & Lucycalys na relación de gañadores.
DANI DICOSTAS: ENTRE A MELANCOLÍA E A DIVERSIÓN
A música de Dani Dicostas ten unha esencia pop que transita entre a melancolía e a diversión. Criada en Vigo e afincada actualmente en Madrid, a artista publicou “Veinte” (2020), “Posdata” (2023) e “Amores pasajeros” (2026). Neste último traballo reuniu referencias como Suki Waterhouse, Sabrina Carpenter e Djo. Recentemente lanzou “En Mi Cabeza”, unha colaboración con La Casa Azul, e o Primavera Sound confirmou a súa presenza no cartel de 2027. Sobre o tema que levará ao Benidorm Fest, nunha entrevista en RTVE Play unicamente avanzou que será “moi pop”. “Vou intentar facer unha reivindicación dun espectáculo moi pop”, afirmou.
“O MELLOR ESCAPARATE MUSICAL”
Durante a presentación, a directora de Comunicación e Participación de RTVE, María Eizaguirre, asegurou que “se notan esas ganas de que comece o festival”. “Temos máis música, máis ilusión e cada ano novos obxectivos”, apuntou. Eizaguirre subliñou que as 18 candidaturas seleccionadas “reflicten a enorme variedade da música” do país e destacou a evolución do certame: “Cada ano subimos un chanzo”.
Tras a presentación dos participantes, o director de TVE, Sergio Calderón, e o director do Benidorm Fest e xefe da delegación española en Eurovisión, César Vallejo, compartiron as súas primeiras impresións sobre a nova edición e o proceso de selección. “É o mellor escaparate musical. Queremos que este festival teña unha longa vida en RTVE. A música é un patrimonio para a televisión pública e o Benidorm Fest é parte do noso corazón”, declarou Calderón. Pola súa banda, Vallejo salientou o compromiso do festival coa industria musical. “Benidorm Fest quere servir á música. Queremos ser un motor musical neste país”, manifestou, antes de agradecer aos artistas a súa xenerosidade ao participar nesta edición. O Benidorm Fest 2027 volverá contar coa colaboración de Spotify, que mantén o premio á canción máis escoitada da edición, e de Univision, que participa con outro galardón específico vinculado ao festival.
