O alcalde de Vigo, Abel Caballero, asegurou que será preciso investir máis de 107,5 millóns de euros para que a cidade poida acoller partidos do Mundial de Fútbol 2030, polo que insistiu en pedir á Xunta e á Deputación de Pontevedra financiamento para que chegue a facerse realidade.

Nun audio gravado e remitido aos medios de comunicación, o rexedor volveu falar da súa idea de solicitar que a administración autonómica e a provincial sufraguen dous terzos destes 107 millóns, mentres que o Concello pagaría o terzo restante.

Por iso, enviou un borrador do convenio a tres bandas que propón para que o asinen Xunta e Deputación, deixando fóra o Goberno, malia que desde o PP solicitaron varias veces que tamén entrase o Executivo central na ecuación. Todo isto para acometer todas as obras necesarias que marca a FIFA para poder ser sede. Entre elas, unha nova reforma da bancada de Tribuna, inaugurada hai apenas 10 anos. Nela gastaríanse máis de 86,7 millóns de euros.

O resto do diñeiro iría destinado a distintas actuacións como campos de adestramento ou gastos de organización, entre outros moitos requisitos que marca a FIFA para poder acoller algún partido do Mundial 2030.