SOS Sanidade Pública reclamou a creación dunha unidade de Grandes Queimados en Vigo que sexa “referente” para todo o sur de Galicia, xa que na actualidade estas instalacións se atopan na Coruña e dan servizo a toda a Comunidade, despois de que o novo concerto co hospital Ribera Povisa suprimise estas dotacións na cidade olívica.
Nun comunicado, a organización salientou que as unidades de Grandes Queimados forman parte dos servizos de “máxima complexidade” do Sistema Nacional de Saúde, ao tratarse de dispositivos “altamente especializados”, dotados de persoal cualificado, tecnoloxía avanzada e infraestruturas específicas. SOS Sanidade Pública engade que esta unidade precisa máis de 1.000 metros cadrados de superficie hospitalaria, unha área de hospitalización con camas específicas, espazos para coidados críticos con illamento, salas de curas ou equipamento cirúrxico especializado.
“A Xerencia da Área Sanitaria de Vigo comprometeuse, hai dous anos, a construír unha unidade de queimados con capacidade para tratar enfermos menos graves, trasladando os grandes queimados á Coruña. A creación desta unidade de queimados limitada contribúe á descapitalización sanitaria da área viguesa, reduce a súa capacidade de desenvolvemento futuro e incrementa as desigualdades territoriais no acceso aos servizos de alta especialización”, criticou SOS Sanidade Pública, esixindo que se cree esta unidade en Vigo.
