O Hospital Álvaro Cunqueiro de Vigo inaugurará o vindeiro luns, día 28 de setembro, o seu novo Hospital de Día de Procesos co obxectivo de reducir “ingresos evitables” e “atencións nas urxencias”. Así o sinalou este xoves o propio conselleiro de Sanidade, Antonio Gómez Caamaño, nunha visita a estas instalacións, que dispoñen duns 400 metros cadrados e supoñen un “gran avance” na “aposta estratéxica” da Xunta por aumentar a capacidade e a calidade asistencial, dixo.
“É unha alternativa excelente á hospitalización convencional e vai permitir liberar espazo no Hospital de Día Oncohematolóxico, que poderá incrementar a súa actividade entre un 20 % e un 25 %”, subliñou, ao tempo que indicou que tamén permitirá desconxestionar o servizo de urxencias, segundo o conselleiro. Tras un investimento de 1,2 millóns de euros, a idea é que este novo Hospital de Día se dedique inicialmente a especialidades como medicina interna, pneumoloxía, neuroloxía e dixestivo. Tal como explicou Gómez Caamaño, que felicitou a Área Sanitaria e os profesionais que traballarán alí, a intención é que se empregue para administrarlles aos pacientes determinados tratamentos.
“O máis importante é reducir os ingresos evitables e as atencións nas urxencias e estes percorridos que ás veces obrigan os pacientes a andar dun lado para outro, coa perda de tempo que iso implica, e mellorar a continuidade asistencial entre os distintos niveis, como Atención Primaria, Urxencias e Atención Hospitalaria”, sentenciou. Pola súa parte, o especialista en Pneumoloxía e xefe de servizo, José Alberto Fernández, amosou a súa “ledicia” pola posta en marcha desta unidade “tan necesaria”, que chega “nun moi bo momento” antes do inverno, cando aumentan os casos de patoloxías respiratorias.
