Marea de Vigo alertou este martes da “escaseza” de persoal no servizo de mantemento e conservación das áreas infantís, biosaludables, deportivas e mobiliario urbano do Concello, que só conta con “catro persoas” pese ao “gran incremento” destas infraestruturas na cidade.
“Soamente hai catro persoas (catro de persoal operario máis un encargado) para os 135 parques infantís, 45 áreas biosaudables, dúas áreas ximnásticas e os máis de 2.000 bancos que figuraban no prego técnico no momento da licitación”, sosteñen desde Marea de Vigo.
“A isto agora súmanse novos parques infantís como os da rúa Aragón, Redomeira, Teixugueiras, Pizarro, Independencia, Venezuela… do mesmo xeito que aumentan en 3.054 metros cadrados as áreas biosaudables en múltiples lugares”, engaden desde o grupo municipal.
“O Concello, que xa modificou en dúas ocasións o contrato con Ferrovial aumentando os importes económicos pero sen esixir máis persoal para o servizo, non é consciente nin das necesidades, nin da degradación rápida de todos os materiais se non ten un mantemento preventivo e acorde ao número de instalacións que existen na actualidade”, destacou Rubén Pérez, portavoz do grupo municipal de Marea de Vigo.
Rubén Pérez sostivo que o executivo municipal mostra “un absoluto deixamento no control das concesionarias públicas e, en definitiva, na propia responsabilidade con respecto á seguridade das viguesas e vigueses que fan uso destas instalacións municipais”.
Segundo trasladou Marea de Vigo, os delegados sindicais da concesionaria levan meses intentando que o Goberno local os reciba para explicarlle “a imposibilidade de que catro persoas manteñan todo ese parque crecente”.
Marea de Vigo recordou que na adxudicación a Ferrovial “primaron criterios estritamente económicos” e que “unha vez máis” queda “demostrado” que o criterio de ser a oferta máis barata “non pode ser o determinante” para os procesos de contratación de servizos públicos.
“Estas empresas empregan un criterio de recortes máis que evidente en materia de recursos materiais e humano, estes últimos aínda máis patentes cando chegan os períodos de vacacións e non se cobren as mesmas ou, por exemplo, nos casos de cobertura por baixas”, criticou Pérez.
