Os veciños dun edificio de Playa América, en Nigrán espertaron este mércores cun gran estrondo, despois de que se derrubasen dous balcóns do inmoble que, por sorte, non causaron feridos. Segundo informou a Europa Press o rexedor municipal, Juan González, o incidente produciuse sobre as 7.00 horas, cando os veciños escoitaron un forte ruído procedente do exterior e “creron que fora un accidente de tráfico”.

En realidade, un balcón do segundo andar (o edificio ten baixo cuberta e dúas alturas) nun dos lados do inmoble veu abaixo e, ao desprenderse, arrastrou o balcón que había debaixo, caendo ambas as estruturas nunha especie de terraza interior na planta baixa.  O alcalde confirmou que as consecuencias se limitan aos danos materiais e que até o lugar acudiron axentes da Policía Local, o arquitecto municipal e el mesmo. Para evitar males maiores, procedeuse a adoptar medidas cautelares de seguridade, como valar a zona e precintar outros dous balcóns máis do inmoble (situados noutra das fachadas do edificio) de maneira preventiva.

Despois destas primeiras actuacións, contactarase coa propiedade do edificio para que adopte as medidas oportunas e revise o resto das estruturas.