A Policía Nacional abriu unha investigación para esclarecer as circunstancias da morte dun home cuxo cadáver foi localizado na mañá deste luns nas proximidades dunha nave industrial de Vigo, segundo informou o Centro Integrado de Atención ás Emerxencias.

O corpo apareceu na zona de San Paio de Navia, na contorna dun polígono industrial. Un particular foi quen alertou os servizos de emerxencias despois de atopar o cadáver á beira dunha das naves.

O aviso chegou ao 112 Galicia pasadas as 8.00 horas. Desde o centro de emerxencias informouse dos feitos á Policía Nacional e á Policía Local de Vigo, ademais de mobilizar a Urxencias Sanitarias de Galicia-061.

Fontes da Policía Nacional explicaron posteriormente que, nunha primeira inspección, o cadáver non presenta aparentes signos de violencia.

Ata o lugar desprazáronse tamén efectivos da Policía Científica, que traballan na identificación do home e nas actuacións necesarias para recoller información que permita avanzar no esclarecemento do sucedido.