O BNG de Vigo reclamou ao goberno local “rectificar” as bases das axudas municipais destinadas a asociacións e entidades locais sen ánimo de lucro destinadas á contratación de persoal, xa que as condicións dificultan que ditas entidades poidan levar a cabo os proxectos. Así, o grupo nacionalista anunciou a presentación dun recurso de reposición para modificar esas bases, ante a falta de resposta do goberno local ás reivindicacións xa trasladadas na Comisión Informativa de Emprego.
Dese modo, o BNG solicita alongar os custos de persoal subvencionable de 9 a 12 meses, que se subvencione o 100 por 100 do persoal consolidado xa contratado en anteriores convocatorias, que se dea apoio económico para o persoal de estrutura, auméntense o importe para afrontar gastos de xestión e establézase un sistema de pagos fraccionados para non “afogar” ás asociacións. Ademais, tamén pide que se garanta o cumprimento dos convenios colectivos e favorézase a contratación indefinida.
“Tal e como están redactadas as bases, non serve para garantir o obxectivo que din perseguir, que é crear e consolidar emprego estable e de calidade”, advertiu o portavoz do grupo, Xabier Pérez Igrexas. Tras lembrar o “papel fundamental” destas entidades, o edil nacionalista sinalou que, ademais do persoal voluntario “comprometido e xeneroso”, tamén necesitan profesionais contratados para levar a cabos os seus proxectos e actividades, e o Concello “ten a responsabilidade de apoialas de maneira eficaz e coherente”.
