O exalcalde socialista de Vigo, Carlos Príncipe, asegurou hoxe que ao expresidente do Goberno, José Luis Rodríguez Zapatero, este mércores lle puxeron “cara de (Eduardo) Zaplana ou de Juan Carlos I” cando foi declarar á Audiencia Nacional polo “caso Plus Ultra” e polas xoias intervidas no rexistro do seu despacho.

Nunha entrevista no programa “La mirada crítica” de “Telecinco”, recollida por Europa Press, o exalcalde galego comparou a posible estratexia do expresidente co resultado do “Caso Naseiro”, a trama que en 1989 salpicou o Executivo de José María Aznar e que puxo a Eduardo Zaplana no punto de mira, pero que finalmente o Supremo anulou por defectos de forma. “Claramente o que lle preocupa a Zapatero non é tranquilizar a opinión pública senón salvar o seu cu do xulgado e entón vai procurar a prescrición do delito”, aseverou Príncipe.

“A ZAPATERO CASE LLE VAN POÑER UNHA RÚA OU O NOME DUNHA SEDE”

Sobre o apoio que Moncloa lle deu ao expresidente tras a súa imputación, Carlos Príncipe aclarou que lle sorprende por que el está “na rúa” tras denunciar un caso de corrupción dunha persoa que “cobrou durante un ano diñeiro público sen ir traballar”, mentres que, segundo a súa opinión, a “Zapatero case lle van poñer unha rúa ou o nome dunha sede”.

Neste sentido, o exalcalde preguntouse se a el o tivesen respectado despois de lle atoparen un millón de euros no seu despacho. “Seguro que non”, apostilou. Ademais, Príncipe lembrou que “Zapatero e Blanco (José Blanco, exsecretario de Organización do PSOE) fixeron unha norma” para botalo en 2015 como candidato tras denunciar a suposta corrupción dalgúns membros da alcaldía e que “despois non deixaron facer nunca máis primarias en Vigo”.