O grupo municipal do BNG en Vigo formalizou un recurso de reposición contra o decreto de convocatoria do pleno extraordinario do próximo 19 de xuño, promovido por BNG e PP para esixir explicacións ao goberno local sobre o accidente mortal da atracción Saltamontes en agosto de 2024 e a imputación da concelleira de Seguridade, ante a negativa do rexedor, Abel Caballero, a comparecer nesa sesión.
Segundo lembrou o portavoz nacionalista, Xabier Pérez Igrexas, este pleno foi convocado a instancia dos grupos da oposición, que reclamaban a comparecencia do rexedor, ademais de propor varios puntos de acordo (esixir o cesamento da edila de Seguridade, Patricia Rodríguez Calviño; crear unha comisión de investigación; e trasladar as condolencias da Corporación á familia do mozo falecido).
Con todo, no decreto de convocatoria do alcalde, o primeiro punto (a comparecencia do propio Caballero) desapareceu da orde do día. O goberno xustificou ese cambio alegando que as comparecencias do alcalde ou os concelleiros deben ser votadas previamente polo Pleno. Ante esta situación, o BNG rexistrou un recurso de reposición ante a supresión “abertamente ilegal” dese punto na orde do día, “vulnerando de maneira grave os dereitos fundamentais dos concelleiros da oposición” e impedindo que estes edís leven a cabo a súa función de control e fiscalización do goberno municipal.
“ÚLTIMA OPORTUNIDADE” DE “RECTIFICAR”
“Este recurso é a última oportunidade que lle damos a Abel Caballero para que rectifique unha decisión arbitraria e contraria a dereito, que se base na idea exasperada de que é o grupo de goberno, coa súa maioría, o que decide se o goberno debe comparecer ou non diante do Pleno”, sinalou Pérez Igrexas. No seu recurso, o BNG advirte de que a decisión do rexedor é “inxusta”, “antidemocrática” e “constitúe un flagrante desvío de poder”, e rexeitou os intentos de xustificación do goberno local, que demostran “o nivel de desesperación” do grupo socialista para tentar evitar que o alcalde “dea a cara dunha vez por todas” e achegar explicacións.
Tras lembrar que a edila de Seguridade está imputada por un posible homicidio imprudente, e que o Saltamontes funcionaba a pesar de non ter autorización municipal, Pérez Igrexas insistiu en que os vigueses e viguesas “merecen explicacións e respostas”, polo que “mutilar” a sesión plenaria extraordinaria, eliminando a comparecencia do alcalde, “é unha inaceptable tomadura de pelo”.
“PREVARICAR PARA VULNERAR DEREITOS”
Finalmente, puntualizou que o recurso de reposición foi interposto en solitario polo BNG, “ante a incomprensible negativa do PP a facelo conxuntamente”. “Non coñecemos nin comprendemos os motivos, pero o BNG si vai dar a batalla ata o final para que o pleno do 19 de xuño non sexa unha pantomima, para que non se faga unha nova sesión inútil, onde todo quede sepultado polo rodete absolutista de Caballero sen dar a cara”.
O portavoz nacionalista tamén reiterou que, se o alcalde non “rectifica”, o BNG resérvase o exercicio de accións xurídicas ou de amparo “para evitar este novo atropelo á democracia por parte dun alcalde erixido en emperador”. “Porque en democracia non todo vale, e prevaricar para vulnerar dereitos fundamentais non pode saír gratis”, sentenciou Pérez Igrexas.
O PP DE VIGO ESTUDA IR AO XULGADO
O PP de Vigo confirmou este mércores que valora acudir á vía contencioso-administrativa para esixir a comparecencia do alcalde, Abel Caballero, ante o pleno municipal, co obxectivo de que dea explicacións pola investigación á concelleira de Seguridade por un posible delito de homicidio imprudente relacionado co accidente mortal do Saltamontes, ocorrido en agosto de 2024. Segundo informou o partido, os seus servizos xurídicos están a analizar esta alternativa tras descartar a presentación dun recurso de reposición —unha vía que si empregou o BNG— contra a convocatoria do pleno extraordinario do próximo 19 de xuño.
Nesa convocatoria, segundo denuncian os populares, o alcalde modificou a orde do día para retirar a petición da oposición de que comparecese ante a Corporación para dar explicacións sobre este caso. O PP considera que a vía administrativa é “ineficaz”, xa que o recurso debería ser resolto polo mesmo órgano que tomou a decisión de eliminar a comparecencia de Caballero da orde do día. Con todo, o grupo municipal sinalou que a opción do contencioso-administrativo non é a única que está sobre a mesa.
Os populares tamén barallan esixir explicacións ao alcalde a través dunha moción, co fin de forzar o debate político arredor da situación da concelleira de Seguridade, Patricia Rodríguez Calviño. En calquera caso, o PP subliñou a importancia do pleno do día 19, convocado a instancia dos grupos da oposición, no que volverá reclamar o cesamento de Rodríguez Calviño. A concelleira continúa á fronte de varios departamentos municipais que os populares cualifican de “máxima importancia”, entre eles Seguridade, Festas, Contratación e Xestión Municipal, malia estar investigada penalmente polo accidente mortal do Saltamontes.
