O eurodeputado socialista, Nicolás González Casares, afeou o “partidismo” do presidente do Porto de Vigo, Carlos Botana, que estes días está de visita en Bruxelas, e ao que acusa de reunirse cun europarlamentario do PP e “nin sequera” solicitar encontros con outros grupos políticos. Nun comunicado, González Casares advertiu de que Botana pon “en risco” os intereses da cidade olívica “por puro partidismo”, e lamentou a “miopía política e o sectarismo” do mandatario do Porto e do PP.
“En Europa non existen maiorías absolutas, de aí a importancia de forxar consensos amplos en interese do Porto e de Vigo. Fraco favor faille ao Porto e a Vigo o descoñecemento do funcionamento das institucións, a miopía e o sectarismo do presidente da Autoridade Portuaria e do PPdeG”, sinalou o eurodeputado socialista. Segundo apuntou, este comportamento enmárcase nun “patrón de conduta habitual” nos dirixentes do PPdeG, con conselleiros que só se reúnen con cargos do seu mesmo partido na capital europea.
No caso da visita do presidente da rada, criticou que “prima o interese partidista” por encima da defensa dos intereses do Porto ou da cidade, e concluíu que “é lóxico que a cidadanía viguesa non confíe no PP” porque “nunca antepoñen a cidade”.
Finalmente, tamén cuestionou o papel da Fundación Galicia Europa, da que sinalou que se debe esperar máis que “actuar de comparsa” dos dirixentes populares. “A Comunidade merece unha fundación proactiva na defensa dos seus intereses en Europa, non unha sucursal máis do PP”, aseverou Nicolás González Casares.
