O alcalde de Vigo, Abel Caballero, abriu este martes unha nova fronte contra a Deputación de Pontevedra, á que acusou de atrasar de forma deliberada os pagos comprometidos en diferentes convenios urbanísticos, entre eles o da reforma da bancada de Gol no estadio de Balaídos. En declaracións remitidas aos medios, o rexedor asegurou que “a Deputación non está a pagar aquilo ao que está obrigada polos convenios asinados” e sinalou que o Concello está “pendente” desde o pasado 10 de marzo do abono de case 3,4 millóns de euros correspondentes ao campo de fútbol.
Igualmente, o alcalde enumerou outras obras cofinanciadas por ambas as administracións nas que, segundo afirmou, a institución provincial mantén débedas: Pintor Colmeiro (804.000 euros), Sárdoma-Moledo (611.000 euros), a piscina de Teis (407.000 euros), o parque Nelson Mandela (291.000 euros), a pista vermella das Travesas (196.000 euros) e a senda Juan Ramón Jiménez (51.000 euros). En total, Caballero cifrou en 2,62 millóns de euros os atrasos en convenios de rúas que, sumados a Balaídos, obrigan ao Concello a anticipar uns 6 millóns de euros. “A Deputación é mala pagadora e tenta que paremos as obras, pero temos liquidez; no caso de Balaídos pretenden que non cheguemos a tempo ao Mundial“, proclamou.
A DEPUTACIÓN DETALLA QUE FALTA DOCUMENTACIÓN
En resposta inmediata ao rexedor, a vicepresidenta da Deputación e presidenta local do PP, Luisa Sánchez, remarcou que todo o diñeiro que a institución ten comprometido con Vigo “está previsto e consignado para entregarlle cando xustifique as súas obrigacións”. Sánchez matizou que o procedemento require un traballo técnico rigoroso e advertiu de que “se o Concello acumula documentación sen enviar durante meses e con erros, a tramitación prolóngase”.
A vicepresidenta lamentou que Caballero custione o labor dos funcionarios municipais e provinciais, e lembrou que os criterios de control son idénticos aos de mandatos anteriores. “Unha vez máis, ao alcalde cégalle o seu sectarismo”, constatou Sánchez, quen convidou ao mandatario local a traballar “con máis dilixencia e coordinación” en lugar de “tensar a corda”. De feito, avanzou que un técnico provincial ten programada unha visita de inspección á bancada de Gol.
Deste xeito, os convenios subscritos entre as dúas entidades estipulan que o Concello pode realizar xustificacións parciais a medida que avanzan os traballos e que a Deputación irá liberando as partidas correspondentes. Non obstante, estes ingresos quedan supeditados por lei á entrega previa de documentos esenciais como as actas de replantexo, as certificacións de obra executada e as copias compulsadas de todas as facturas emitidas polas construtoras.
