A Consellería de Sanidade adxudicou por case 1,8 millóns de euros as obras da nova área de cirurxía maxilofacial de Vigo, que estará situada no Hospital Meixoeiro, segundo informou o departamento autonómico nun comunicado. A empresa Elecnor Servizos e Proxectos resultou a adxudicataria destes traballos, que teñen por obxectivo a construción dun espazo especializado de vangarda. A nova área contará con tres consultas, unha sala polivalente, unha sala de espera, unha sala de simulación, un despacho e unha sala cirúrxica.

Cun prazo de execución fixado en nove meses, as obras levan aparelladas a reestruturación dos tres quirófanos de cirurxía local xa existentes, unha intervención coa que se mellorará notablemente a cobertura de toda a actividade cirúrxica global do hospital, segundo destaca a Xunta. Está previsto que, de forma inicial, esta unidade de referencia atenda a pacientes procedentes das áreas sanitarias de Vigo e de Ourense, Verín e O Barco de Valdeorras, dotándose para iso de equipamento tecnolóxico de última xeración.