Os grupos municipais do PP e do BNG no Concello de Vigo impulsarán a convocatoria dun pleno extraordinario para abordar a imputación da concelleira de Seguridade, Patricia Rodríguez Calviño, por un suposto homicidio imprudente. A investigación xudicial relaciónase coa morte dun mozo nas festas de Matamá de agosto de 2024, tras soltarse un ‘brazo’ da atracción Saltamontes.

Hai unha semana o PP propuxo ao grupo nacionalista unir os votos da oposición para forzar esta sesión, pero a iniciativa non frutificou inicialmente porque o BNG agardaba por unha solicitude previa de comparecencia do alcalde. Ante a falta de resposta de Abel Caballero, o portavoz nacionalista, Xabier Pérez Igrexas, anunciou este venres que se reunirá o vindeiro luns coa portavoz do PP, Luisa Sánchez, para iniciar o proceso de convocatoria.

Pérez Igrexas cualificou de “silencio insultante” a actitude do rexedor e afirmou que a medida busca que o alcalde “non siga fuxindo deste grave caso e dea a cara dunha vez por todas”. O edil afeou a Caballero que siga “encastillado no seu despacho” e que a súa única decisión fose ratificar a confianza nunha concelleira investigada por homicidio imprudente, insistindo en que o goberno municipal debe asumir responsabilidades políticas.

Pola súa banda, o grupo liderado por Luisa Sánchez xa presentou a súa proposta de acordo para este pleno extraordinario. O PP expón pedir o cesamento da edila imputada, instar o alcalde a dar explicacións e crear unha comisión de investigación sobre o suceso. Así mesmo, a proposta inclúe trasladar oficialmente á familia do mozo falecido, Iván C.H., as condolencias de toda a Corporación municipal.