Dous motoristas resultaron feridos este martes en Vigo tras verse implicados en senllos accidentes nos que se produciron colisións entre as súas motos e turismos, segundo sinalaron desde o 112. Os sinistros mobilizaron aos servizos de emerxencia e foron necesarios traslados sanitarios para atender aos condutores das motocicletas.

O primeiro dos accidentes ocorreu sobre as 15:30 horas na Avenida de Clara Campoamor, cando se produciu un choque entre un coche e unha moto que provocou lesións ao condutor do vehículo de dúas rodas. Un particular deu a voz de alarma e ao lugar acudiron de inmediato efectivos da Policía Local e persoal sanitario para prestar os primeiros auxilios.

O segundo sinistro tivo lugar na Praza de España ao redor das 18:15 horas. Neste caso, tratouse tamén dunha colisión entre unha moto e un coche que se saldou co motorista ferido. Foi o 061 o que deu aviso ao centro de atención ás emerxencias, que mobilizou aos bombeiros da cidade olívica e á Policía Local para regular o tráfico e atender a incidencia.