A sección segunda da Audiencia Provincial de Pontevedra celebrará o vindeiro 7 de maio a audiencia preliminar contra dúas persoas acusadas dun delito de apropiación indebida tras presuntamente estafar case 80.000 euros a un cliente pola construción dunha vivenda prefabricada en Mos. As obras, segundo sostén a Fiscalía, quedaron inacabadas malia os pagos realizados.

De acordo co escrito do Ministerio Público, os acusados ofrecían un servizo integral de venda e instalación de casas prefabricadas. En 2020, a vítima contratou a construción dunha vivenda tipo steel framing por máis de 127.000 euros, chegando a efectuar ata nove transferencias. Con todo, a acusación sinala que iniciaron os traballos para abandonalos pouco despois, apropiándose de 79.678,16 euros sen completar o proxecto.

A Fiscalía solicita para cada un dos procesados catro anos de prisión, ademais dunha multa económica e a indemnización conxunta ao prexudicado. Pola súa banda, o afectado viuse obrigado a contratar outra empresa para rematar a obra, mentres continúa o proceso xudicial para determinar responsabilidades.