O goberno de Vigo aprobará finalmente este venres o proxecto para o retranqueo dos colectores que permitirá reformar de novo a bancada de Tribuna do estadio de Balaídos. Segundo indicou o alcalde, Abel Caballero, esta actuación é unha “parte importantísima” dos traballos necesarios para que o estadio vigués poida cumprir coas esixencias da FIFA e converterse en sede do Mundial de Fútbol 2030.

O rexedor explicou que baixo o chan de Tribuna discorren dous grandes colectores, o do río Lagares e o de Fragoso, que deben ser desviados para acometer a nova ampliación. Esta tarefa de enxeñaría civil requirirá un volume de escavación de aproximadamente 8.500 metros cúbicos. O investimento estimado para esta fase supera os 2,8 millóns de euros, unha contía que Caballero agarda que sexa financiada a partes iguais entre o Concello, a Xunta de Galicia e a Deputación de Pontevedra.

Este paso técnico supón, en palabras do alcalde, o inicio da obra física da nova bancada de Tribuna. O proxecto final ten como obxectivo que Balaídos alcance unha capacidade de 43.000 espectadores, superando así o requisito mínimo que establece a organización do Mundial para os estadios que acollerán partidos da competición.