A investigación xudicial do accidente mortal ocorrido na atracción Saltamontes, en agosto de 2024, nas festas de Matamá (Vigo), encara a súa recta final coa práctica das últimas declaracións testemuñais. O procedemento atópase á espera de que o xuíz de instrución dite o auto para o arquivo das actuacións ou para a apertura de xuízo oral. Este xoves prestaron declaración como testemuñas un bombeiro e dous axentes da Policía Local de Vigo, así como dous técnicos municipais. O avogado da parella do mozo falecido sinalou que as dilixencias practicadas poñen de manifesto que a atracción non cumpría coa documentación pertinente nin coas condicións para funcionar, e defendeu que o Concello non debeu permitir nin sequera a súa instalación.
Nesa mesma liña, o letrado lembrou que existiu un correo electrónico remitido desde a Concellería de Seguridade á Xefatura da Policía Local informando de que varias atraccións, entre elas o Saltamontes, non entregaran toda a documentación e carecían de autorización. No entanto, o avogado recalcou que “non había unha orde expresa” á Policía para proceder ao precinto desas atraccións ou para impedir que se puxesen en marcha, ao contrario do que sostén a concelleira de Seguridade. “Bótanse a culpa uns a outros“, sinalou o letrado, quen trasladou a súa confianza en que non se arquive o procedemento para que os responsables paguen polo que deixaron de facer.
Os feitos ocorreron na madrugada do 3 de agosto de 2024, cando un dos brazos da atracción rompeu e un mozo de 36 anos, Iván C.H., caeu ao baleiro sufrindo lesións que lle causaron a morte. Días despois, o Concello de Vigo aclarou que non se autorizou o funcionamento da estrutura porque faltaba documentación, unha circunstancia que, segundo a versión municipal, fora notificada tanto ao propietario como á comisión de festas. Na causa figuran como investigados o dono do Saltamontes, o presidente da comisión de festas de Matamá, a concelleira de Seguridade Patricia Rodríguez, o xefe da Policía Local, o xefe da área municipal de Seguridade, o perito que revisou a atracción e a propia comisión de festas como entidade.
