O conselleiro de Presidencia, Xustiza e Deportes, Diego Calvo, participou este luns nun encontro co grupo de empresarios Vicus Gallaecia, onde abordaron os retos para mellorar a mobilidade da Comunidade, centrándose tanto no transporte ferroviario como nos aeroportos. Levado a cabo no Hotel Pazo Os Escudos de Vigo, Calvo trasladou aos empresarios a postura do Goberno galego para captar rutas aéreas mediante a promoción turística en orixe, sumándose así ao modelo proposto por AENA.
Respecto ao AVE entre Vigo e O Porto, o conselleiro advertiu da “falta dun calendario realista” por parte do Executivo central español, o que considera un “obstáculo” para a competitividade empresarial. Ante os medios de comunicación, Calvo puxo en valor a importancia de debater sobre asuntos que interesan aos empresarios e tratar de buscar solucións “positivas” para todos os axentes implicados.
Pola súa banda, o presidente de Vicus Gallaecia, José Manuel Fernández Alvariño, agradeceu a Diego Calvo que asistise á comida deste luns. O representante empresarial subliñou a importancia de falar dos aeroportos galegos para buscar solucións que impulsen o desenvolvemento económico e a conectividade do territorio.
