Movemento Sumar Galicia remitiu unha carta a Esquerda Unida, Verdes Equo, Anova e Podemos Vigo para solicitar unha reunión conxunta e avanzar cara á construción dunha posible coalición de esquerdas na cidade de Vigo, co fin de presentarse ás eleccións municipais de 2027.
A carta, asinada pola secretaria de Organización de Sumar Galicia, Gloria Alonso e polo secretario comarcal de Vigo, Diego J.Diarte, expón que a iniciativa responde a un acordo adoptado na última asemblea de Sumar en Vigo e “expresa a vontade de abrir un proceso de diálogo con responsabilidade e vontade de acordo para explorar puntos programáticos comúns e definir liñas de actuación compartidas”.
Os responsables de Sumar Galicia sinalaron que o propósito é “construír unha alternativa con capacidade de maioría en Vigo, baseada na unidade das forzas de esquerda e nun proxecto sólido para a cidade”. sí, lembran que a organización “conta con experiencia de colaboración” en distintos espazos sociais e políticos de Vigo, como a Plataforma Cívica prol Palestina, que consideran “un exemplo de coordinación entre diferentes sensibilidades ao redor de obxectivos comúns”.
Sumar Galicia apunta á necesidade de articular respostas políticas coordinadas nun contexto municipal no que fan falta “propostas alternativas” ás actuais políticas do goberno de Abel Caballero, apostando por unha proposta centrada nas necesidades sociais, na defensa dos servizos públicos e a mellora das condicións de vida da maioría social.
Como primeiro xesto simbólico desa vontade de colaboración, Sumar Galicia propuxo a participación conxunta na mobilización do Primeiro de Maio, cunha presenza unitaria “baixo unha mensaxe común de defensa dos dereitos laborais e sociais”. inalmente, trasladaron o seu desexo de que esas reunións poidan desenvolverse nas próximas semanas, para avanzar cara a un posible “acordo amplo” que permita presentar á cidadanía “unha candidatura unitaria, cohesionada e con vocación de maioría”.
