O BNG de Vigo reclamou á Xunta de Galicia que arranxe as “deficiencias” do centro de día Atalaia, tras as denuncias de familias usuarias e persoal polas filtracións de auga e frío que padecen “desde hai 15 anos”. Nun comunicado, o Bloque informou de que trasladou iniciativas ao Parlamento galego para recoller estas demandas provocadas pola deterioración das xanelas.

Este xoves, a deputada Carmela González e o portavoz municipal do BNG en Vigo, Xabier P. Igrexas, reuníronse con familias e representantes dos traballadores para coñecer de primeira man o mal estado das instalacións. “É inaceptable que un centro de día, no que se atenden a 25 persoas maiores, filtre auga os días de choiva e no que entre vento e frío”, criticaron os nacionalistas, quen advertiron dos riscos para a saúde e das situacións de inseguridade que xera esta situación.