A Garda Civil, nun operativo conxunto con Vixilancia Aduaneira, interceptou unha embarcación de alta velocidade —coñecidas como narcolanchas— que era transportada por estrada a bordo dun camión no concello de Salvaterra de Miño.
Segundo os primeiros datos da investigación, o destino final da planeadora era a cidade de Ceuta.
A intervención produciuse grazas á vixilancia estratéxica que as forzas de seguridade manteñen no sur de Galicia, unha zona historicamente vencellada á fabricación e transporte deste tipo de naves prohibidas pola lei de contrabando. A embarcación, duns dez metros de eslora e cun valor estimado de 30.000 euros, carecía de calquera tipo de rexistro ou documentación legal.
Tanto o Equipo de Delincuencia Organizada e Antidroga (EDOA) da Comandancia de Pontevedra como o Servizo de Vixilancia Aduaneira procederon á identificación dos transportistas e dos responsables implicados na loxística. As pescudas actuais céntranse en determinar se este envío ten relación coa rede criminal desarticulada recentemente en Ceuta, onde se descubriu un sofisticado “narcotúnel” para o tráfico de haxix e cocaína, e no que tamén estarían involucrados individuos con ligazóns en Vigo e outras localidades da provincia.
Este novo golpe volve poñer o foco nos vínculos operativos entre os grupos de narcotraficantes de Pontevedra e as organizacións que operan no Estreito de Xibraltar.
