A presidenta do PP de Vigo, Luisa Sánchez, reclamou ao alcalde, Abel Caballero, que aclare de forma inmediata se as festas deste verán nos barrios e parroquias da cidade se van poder celebrar con normalidade ou se manterá o veto ás atraccións. Nun comunicado, Sánchez criticou que ese veto pon en risco as celebracións, xa que implica que as comisións deixen de ingresar un diñeiro que supón o 80% do seu orzamento. A líder do PP local cuestionou se o rexedor, que xa arrincou a súa tempada de concertos en Castrelos, ten previsto resolver a incerteza que rodea ás festas populares, preguntando expresamente pola situación da comisión de Coia respecto á subvención comprometida e non abonada.

Ante as dúbidas expresadas por unha comisión de festas, a portavoz popular lembrou que, sen eses ingresos, é practicamente imposible organizar os festexos como se viñan facendo. Segundo a dirixente, o alcalde non compensou a diminución de ingresos tal e como solicitara a inmensa maioría das comisións e como o propio Caballero se comprometeu publicamente, polo menos coa comisión de Coia. A voceira incidiu en que as atraccións de feira e as comisións de festas non teñen por que pagar a mala xestión do Concello nin os problemas xudiciais derivados do accidente do saltamontes, apuntando que hai numerosos autónomos cuxo traballo depende desta decisión e cuxa actividade se atopa na actualidade no aire.