A conselleira de Vivenda e Planificación de Infraestruturas, María Martínez Allegue, denunciou este mércores no Parlamento de Galicia o acto “propagandístico” que convocaron o alcalde de Vigo, Abel Caballero, e o delegado de Zona Franca, David Regades, para escenificar a firma do convenio de urbanización do PS-1 da antiga ETEA e de construción dun aparcadoiro, un acto ao que non foi convidada a Xunta a pesar de financiar a totalidade da urbanización dos viarios con 10,5 millóns de euros.
Así o trasladou no Cámara autonómica en resposta a unha pregunta do grupo parlamentario do PP, sobre as actuacións que o goberno galego está a executar nese ámbito. A conselleira lembrou que o desbloqueo do PS-1, que permite dar servizos a edificacións como a futura residencia de maiores que financia a Fundación Amancio Ortega, foi acordado na reunión que mantivo que o presidente da Xunta, Alfonso Rueda, co rexedor olívico, en xuño de 2024.
A pesar dese acordo, e tras a aprobación do convenio correspondente por parte da Xunta en maio de 2025, o goberno municipal e a Zona Franca non deron o visto e prace ao documento até 8 meses despois, en xaneiro de 2026. “Non sabemos o motivo deste atraso”, explicou Martínez Allegue no Parlamento, que tamén se referiu ao atraso na firma do documento e á negativa do goberno local a pór os viarios a disposición para que a Xunta executase a urbanización.
De feito, lembrou que a Xunta, á vista de que o goberno de Vigo non se decidía a pór data ao acto de firma, optou por subscribir o acordo e remitilo ao Concello a mediados de febreiro pasado. “O inaudito veu despois”, lamentou a conselleira, antes de lembrar que Concello e Zona Franca escenificaron a súa propia firma o pasado 25 de febreiro, coa ausencia de representantes do goberno galego, a pesar de que o Executivo autonómico será quen pague os 10,5 millóns de euros da urbanización dos viarios (mentres que Zona Franca porá máis de 15 millóns de euros para un aparcadoiro subterráneo que logo explotará).
“Convocaron un acto mediático, propagandístico. Menuda cara”, proclamou a conselleira, que desvelou que, ao día seguinte dese acto, o Concello de Vigo contactou coa Consellería para solicitar a firma dixital da conselleira nese acordo (na versión en castelán). “Nun exercicio infinito de paciencia, asineino, claro que o asinei”, explicou, antes de insistir en que a Xunta ten unha “aposta firme” polo desenvolvemento da ETEA e, de feito, “é a única administración” que está a facer obras alí actualmente.
