O Tribunal Superior de Xustiza de Galicia (TSXG) confirmou a pena de catro anos de prisión para un home por agredir sexualmente á neta da súa parella cando esta tiña 14 anos de idade. O Alto tribunal galego desestimou así o recurso de apelación interposto polo procesado contra a sentenza ditada o pasado mes de setembro pola sección quinta da Audiencia Provincial de Pontevedra, con sede en Vigo.
O home foi condenado como autor dun delito de agresión sexual a menor de 16 anos. Ademais da pena de cárcere, a xustiza impúxolle unha orde de afastamento da vítima de 300 metros durante nove anos e a inhabilitación especial para calquera profesión ou oficio que implique contacto con menores durante sete anos. Así mesmo, o fallo inclúe a inhabilitación para o exercicio da patria potestade durante cinco anos e outros cinco de liberdade vixiada unha vez saia de prisión. No ámbito civil, o condenado deberá indemnizar á moza con 3.500 euros.
AGRESIÓN DURANTE UNHA PERNOCTA NO DOMICILIO
Os feitos probados recollidos na sentenza sitúan o episodio en novembro de 2023, nunha ocasión na que a menor durmiu no mesmo domicilio que o seu abrastre. Segundo o fallo, o acusado dirixiuse á habitación da vítima con ánimo de satisfacer os seus desexos sexuais e comezou a abrazala mentres deslizaba as mans cara aos seus peitos, chegando a preguntarlle se lla permitía tocalos.
A pesar da negativa da menor, o home mantivo os seus brazos ao redor dela apertándoa contra si. Cando a moza logrou soltarse e dirixirse á cama, o agresor seguiuna e agarrouna fortemente por detrás, dirixindo de novo as mans cara aos seus peitos e pegándose insistentemente a ela mentres a presionaba co seu pene erecto. Tras analizar o recurso, o TSXG ratifica agora a integridade da sentenza inicial ao considerar probados estes feitos.
