A Xunta de Galicia anunciou este luns que Vigo acollerá o próximo 28 de abril a cuarta edición do ‘Global Sustainable Seafood Galicia Forum’, un encontro que reunirá a distintos axentes do sector marítimo, desde pescadores ata empresarios e expertos internacionais. O Executivo autonómico salientou que a iniciativa, cofinanciada con 75.625 euros pola propia Xunta e polo Fondo Europeo Marítimo de Pesca e Acuicultura (Fempa), converterá Galicia nun “escaparate internacional de calidade e excelencia dos produtos do mar”. Segundo informou a Administración autonómica, este luns formalizouse o convenio de colaboración coa Fundación Nova Pescanova, que permitirá o desenvolvemento do evento.
SUSTENTABILIDADE NAS TRES VERTENTES
A conselleira do Mar, Marta Villaverde, destacou a “oportunidade” que supón o foro para avanzar en propostas que “garantan a sustentabilidade do marisco galego na súa vertente social, ambiental e económica”. Villaverde enmarcou o encontro no compromiso da Xunta cun modelo pesqueiro baseado na sustentabilidade ambiental, na rendibilidade económica e na cohesión social das zonas costeiras. Na súa terceira edición, o foro reuniu a máis de 300 profesionais de 30 países, consolidándose como un punto de encontro internacional para o debate sobre o futuro do sector marítimo-pesqueiro.
