A Fiscalía solicita penas que suman 33 anos de prisión para José Manuel D.X., alias ‘O Chioleiro’, polo asasinato da que era a súa parella, María del Carmen B.D. O cadáver da muller foi localizado o 22 de febreiro de 2024 no interior dunha maleta envolta en plástico, nunha leira próxima á rúa Espedrigada, na zona de Balaídos. O acusado é un vello coñecido da xustiza, xa que conta con dúas condenas previas por asasinato: unha en 1988 por matar á súa avoa e outra en 2004 polo crime dunha veciña na Lama.
Segundo o escrito de acusación, os feitos producíronse na noite do 14 de setembro de 2023 na habitación que ambos compartían na rúa Fragoso. A Fiscalía sostén que o procesado estrangulou á muller e cravoulle un coitelo na clavícula e no corazón. O Ministerio Público incide en que a vítima, de 60 anos, non tivo posibilidade de defensa e que o acusado actuou movido por un sentimento de “superioridade” e “posesión” polo feito de ser muller.
ASASINATO CON AGRAVANTES E ESTAFA CONTINUADA
Tras cometer o crime, ‘O Chioleiro’ ocultou o corpo na maleta e abandonouno na leira onde foi atopado meses despois por un repartidor debido ao forte cheiro. Ademais do asasinato, a Fiscalía acúsoo de quedar co cartón bancario da falecida, realizando gastos superiores aos 1.800 euros entre os meses de setembro e decembro de 2023. Por estes motivos, impútanselle un delito de asasinato coas agravantes de parentesco, reincidencia e xénero, así como un delito continuado de estafa.
A petición fiscal desglósase en 30 anos polo asasinato e outros 3 anos pola estafa. Así mesmo, solicítanse indemnizacións para a familia da vítima que superan os 150.000 euros en total, repartidos entre a filla, a nai e os tres irmáns da muller. O caso, que conmocionou á cidade de Vigo, será xulgado por un tribunal de xurado popular tras completarse a instrución no Xulgado de Violencia sobre a Muller.
