As patronais do sector do metal (Asime, Atra e Instalectra) decidiron non acudir á reunión da negociación do convenio colectivo da provincia de Pontevedra, que estaba programada para o vindeiro luns día 2 de febreiro en Vigo. A decisión tomouse tras coñecer que os sindicatos convocaron unha protesta ás portas do hotel onde se ía celebrar o encontro, o que xerou un “profundo malestar” entre a representación empresarial.
Nun comunicado, as patronais consideraron que esta concentración supón unha vulneración dos principios básicos de boa fe que deben rexer o proceso. Segundo a parte empresarial, a mobilización é unha “falta de respecto” á mesa negociadora e ao propio diálogo que se está a desenvolver. Por este motivo, acordaron non participar na reunión e deixar a nova convocatoria pendente ata que se dean as condicións adecuadas para retomar o contacto nun clima de respecto mutuo, reiterando que a súa vontade de negociar se mantén, pero sempre dentro das canles legais.
CONVENIOS DISTINTOS E CRÍTICAS SINDICAIS
A polémica xorde porque a protesta convocada pola CIG, CC.OO. e UXT non tiña como obxectivo o convenio que se ía tratar o luns, senón reclamar o “desbloqueo” do convenio do comercio do metal de Pontevedra. Os sindicatos pretendían aproveitar a presenza de Atra na reunión para facer visibles as súas demandas sobre este outro documento, cuxas negociacións se prolongaron sen acordo durante todo o ano 2025. A parte social defende que as medidas de presión son necesarias para lograr un convenio digno tras o vencemento do anterior en decembro de 2024.
Pola súa banda, a CIG emitiu outro comunicado no que tacha a decisión da patronal de “estratexia” para bloquear as negociacións. O sindicato insiste en que a concentración é allea á mesa do metal de Pontevedra, xa que foi organizada especificamente por traballadores do comercio do metal. Desde a central sindical criticaron o uso desta “escusa basta” para impedir que as empresas e o persoal alcancen canto antes un acordo que beneficie a ambas as partes
